महान् जनयुद्धको दौरानमा झण्डै चौध हजारभन्दा बढी वीरवीराङ्गानाहरुले सहादत प्राप्त गरे । कैयौं योद्धाहरु राज्यद्वारा बेपत्ता पारिए र कैयौं योद्धाहरु घाइते अपाङ्ग भएका छन् । बीसौं जनयुद्ध दिवसको यस ऐतिहासिक अवसरमा हामी वीर अमर सहिदहरुप्रति भावपूर्ण श्रद्धाञ्जली अर्पण गर्दछौं, बेपत्ता योद्धाहरुप्रति उच्च सम्मान जाहेर गर्दछौं र घाइते–अपाङ्ग योद्धाहरुप्रति विशेष सम्मान प्रकट गर्दछौं । साथै, महान् जनयुद्धको प्रक्रियामा सहभागी हुने तथा सहयोग गर्ने जनसमुदाय, शुभचिन्तक, परिवर्तनका हितैषी सबैप्रति नेपाली जनप्रगतिशील मोर्चा, युएई हार्दिक अभिवादन तथा शुभकमना व्यक्त गर्दछौं । 

महान् जनयुद्धले लक्षित गरेको देश तथा जनतालाई उत्पीडनबाट मुक्त गरी नयाँ जनवादी राज्यसत्ता स्थापना गर्ने हाम्रो उद्देश्य यतिवेला संकटमा छ । महान् सहिद, बेपत्ता योद्धा, घाइते–अपाङ्गसहित सम्पूर्ण जनताले त्याग, वीरता, बलिदानलाई आत्मसातथ गर्दै नयाँ जनवादी क्रान्ति सम्पन्न गर्ने ऐतिहासिक अभियानमा विश्रृखलित माओवादी आन्दोलन एकताबद्ध भएर दृढसङ्कल्पका साथ अघि बढोस् भन्ने कामना गर्न चाहन्छौ । बीसौं महान् जनयुद्ध दिवसको यस ऐतिहासिक अवसरमा सम्बन्धित सबैप्रति क्रान्तिकारी अभिवादन र शुभकामना व्यक्त गर्दै माक्र्सवाद–लेनिनवाद–माओवादको पथप्रशर्दनमा निरन्तर क्रान्तिको यात्रामा अविचलित भई दृढतापूर्वक अगाडि बढ्ने प्रण गर्न सम्पुर्णमा नेपाली जनप्रगतिशील मोर्चा युएई हार्दिक आव्हान गर्दछ ! 

क्रान्तिकारी अभिवादन सहित !

मितिः २०७१ फागुन १ गते