यो पहिलो पटक विदेश जानेको संख्या हो । एकपटक गएर फेरि फर्कनेको संख्यासमेत जोड्दा दैनिक २ हजार युवा रोजगारीका लागि विदेश उडेका छन् । पुनः श्रमस्वीकृति लिएर पुसमा १७ हजार ८७ युवा बिदेसिएका छन् । असोजमा दैनिक १२ सय ६६ युवा बिदेसिएको तथ्यांक छ ।

राजनीतिक अन्योल र लगानीमैत्री वातावरण अभावले रोजगारी सिर्जना नहुँदा बिदेसिनेको संख्या बढेको विभाग बताउँछ । “पुसमा मात्र ४० हजार ८ सय ६४ युवा विदेश गए,” विभाग महानिर्देशक पूर्णचन्द्र भट्टराईले भने, “मलेसियामा धेरै कारणले कामदार माग बढेको छ, त्यसको प्रभाव पनि हो ।”

मलेसियाले जनवरीदेखि कामदारको न्यूनतम पारिश्रमिक ९ सय रिंगेट (२५ हजार २ सय रुपैयाँ) लागू गरेको छ । यसले म्यानपावर एजेन्सी पनि मलेसियातिर केन्द्रित भएका छन् । पुसमा सबैभन्दा बढी युवा गएको मुलुक पनि मलेसिया हो । त्यहाँमात्रै १४ हजार ७ सय ५९ युवा गएका छन् । चालू आवका ६ महिनामा ७७ हजार ९ सय ९२ नेपाली मलेसिया गएका छन् ।

पुसमा ६ हजार ७ सय २४ कतार, ८ हजार ३ सय १४ साउदी अरब, ३ हजार ९ सय ६८ यूएई, १ हजार ७ सय १५ कुवेत, २ सय ८४ बहराइन, २ सय ९५कोरिया र २ सय ३० जना ओमान गएका छन् ।

“राजनितिक अस्थिरता, बजेटको अन्योल, ऊर्जा अभाव, श्रम समस्या, नीतिगत अस्पष्टताका कारण रोजगारी सिर्जना हुने लगानी आउन सकेनन्,” वैदेशिक रोजगार क्षेत्रका जानकार अर्थशास्त्री डा. चिरञ्जीवी नेपाल भन्छन्, “यसले बिदेसिनेको संख्या बढ्यो । त्यसमाथि सञ्चालनमा रहेका उद्योग पनि बन्द भएकाले काम खोज्न बाहिर जाने क्रम उच्च छ ।”

चालू आवमा विकास खर्च १५ प्रतिशतमात्र छ । पूर्ण बजेट आउन नसकेकाले विकास निर्माणका काम पनि ठप्प छन् । नयाँ उद्योग थपिनुको सट्टा बन्द भइरहेका छन् । “यसले गर्दा स्थानीयस्तरमा रोजगारी छैन, रोजगारी नभएपछि जीविकोपार्जनका लागि बिदेसिनु बाध्यता हो,” नेपालले भने ।

यो अवधिमा संस्थागत रूपमा बिदेसिनेको संख्या ह्वात्तै बढेको छ । करिब ६० प्रतिशत युवा म्यानपावर एजेन्सीमार्फत गएका छन् । ६ महिनामै २ लाख २ सय ५ लाई पहिलोपटक र ७७ हजार ८ सय २० लाई पुनः श्रमस्वीकृति दिइसकिएको महानिर्देशक भट्टराईले बताए । “अब गन्तव्य मुलुकमा समस्या नआए पहिलोपटक श्रम स्वीकृतिमा ४ लाख र पुनः स्वीकृतिमा १ लाख ५० हजार युवा बिदेसिनेछन्,” उनले भने, “माग आउने तीब्र भएकाले यो संख्या अझै बढ्नेछ ।”

साउन                          ३२६८५

भदौ                        २८०८७

असोज                          ३८००५

कात्तिक                          २५६१७

मंसिर                              ३४९४७

पुस                                ४०८६४

- karobardaily