बलजफ्ती चुनाव भए प्रतिरोध

नेपाल कम्युनिस्ट पार्टी–माओवादीका अध्यक्ष मोहन वैद्य ‘किरण’ले सहिदका सपनामाथि खेलवाड गर्नेहरूले बलपूर्वक चुनाव गर्न खोजे सशक्त प्रतिरोध गर्ने बताएका छन् । जनताका सपनामाथि खेलवाड गर्नेहरुले आफ्नो स्वार्थमा देशलाई भजाउन खोजेमा जनताले माफी नदिने बताउँदै अध्यक्ष किरणले त्यो प्रक्रियामा प्रचण्ड र बाबुरामलाई पनि जनताले बाँकी नराख्ने चेतावनी दिए ।

अखिल नेपाल जनसांस्कृतिक महासंघले सोमबार काभ्रेको अनेकोटमा आयोजना गरेको सांस्कृतिक प्रतिरोध दिवसका अवसरमा अध्यक्ष किरणले उक्त चेतावनी दिएका हुन् । उनले विदेशीहरूको इशारामा अन्तरिम संविधानका सबै विधि र प्रक्रिया मिचेर बलपूर्वक गराउन खोजिएको चुनावका विरूद्ध आफूहरूले कडा प्रतिरोध गर्ने बताए । यस्तो चुनाव आफूहरूलाई कुनै हालतमा मान्य नहुने बताउँदै नेता किरणले भने, ‘बलजफ्ती चुनाव गराउन खोज्नेहरूका हात खुट्टा जनताले भाँच्ने छन्, जनताले त्यतिबेला प्रचण्ड र बाबुरामसमेतलाई बाँकी राख्ने छैनन् ।’

आफूहरू क्रान्तिप्रति इमानदार रहेको विश्वास दिलाउँदै नेता किरणले आफू सहिद हुन तयार रहेको बताए । उनले आफू सहिद भए पनि क्रान्तिप्रति धोका नदिने प्रतिबद्धता समेत व्यक्त गरे । प्रचण्ड र बाबुरामले विदेशीहरूका सामु आत्मसपर्मण गरेको भएपनि आफू शहदात दिन कत्तिपनि नहच्चकिने बताए ।

नेकपा (माओवादी) का संयोजक मातृका यादवले जनताको समस्या समाधान गर्न सशस्त्र संघर्ष आवश्यक रहेको बताए । जनताका समस्या क्रान्तिसँग जोडिएकाले यसका लागि नेकपा–माओवादीले क्रान्तिकारीहरूको अगुवाइ गर्नु पर्ने बताउँदै संयोजक यादवले आफूहरू सहयोग गर्न तयार रहेको बताए । ‘क्रान्तिकारी पार्टीहरूलाई नेतृत्व गरी माओवादी अघि बढनुपर्छ’ उनले भने ।
महासंघले आयोजना गरेको प्रतिरोध दिवसमा सरिक क्रान्तिकारी कम्युनिस्ट पार्टीका महासचिव मणि थापाले प्रचण्ड बाबुरामले १२ बुँदेदेखि गद्दारी गरेको बताए । उनले यस्ता गद्दारहरूलाई जनताले बाँकी नराख्ने बताए ।

नेकपा–माओवादीका पोलिटब्युरो सदस्य सोनामले राष्ट्रघाती गर्ने जनघातीहरूले क्रान्ति र विचार वर्ग र जनतालाई धोका दिएको बताए । उनले प्रचण्ड बाबुरामले क्रान्तिका नाममा गद्दारी गरेकाले क्रान्तिलाई पूरा गर्नु पर्ने कार्यभार आफूहरूले पूरा गर्ने दावी गरे ।

Labels: