» लोकमान नियुक्तिको सिफारिस विरुद्ध विद्यार्थी सडकमा

अन्तरिम संविधान विपरित अख्तियार दुरुपयोग अनुसन्धान आयोगमा पूर्व मुख्य सचिव लोकमान सिंह कार्कीको नाम सिफारिसको विरुद्ध विद्यार्थी सडकमा उत्रिएका छन्। नेपालमा राजतन्त्रको समाप्ति र गणतन्त्रको स्थापनाका लागि भएको ऐतिहासिक जनआन्दोलन २०६२/६३ दबाउनमा प्रमुख भूमिका खेलेको व्यक्तिलाई अख्तियार प्रमुख बनाउन गरिएको सिफारिस विरुद्ध विभिन्न विद्यार्थी संगठन सडकमा चर्का नारा र टायर बाल्दै  उत्रिएका हुन् ।

आइतबार बसेको संवैधानिक परिषद् बैठकले लोकमानसिंह कार्कीलाई अख्तियार दुरुपयोग अनुसन्धान आयोगको प्रमुख नियुक्तिका लागि राष्ट्रपति समक्ष सिफारिस गरेको विरुद्ध विभिन्न विद्यार्थी संगठन आन्दोलनमा उत्रिएका हुन् । राजधानीका विभिन्न क्याम्पस अगाडि सोमबार विद्यार्थीले विभिन्न लोकमान कार्की, अन्तरिम चुनावी मन्त्री परिषदका अध्यक्ष खिलराज रेग्मी र लोकमानसिंह कार्कीको नाम संवैधानिक परिषद समक्ष पेश गर्ने राजनीतिक दलका शीर्ष नेता विरुद्ध चर्को नाराबाजी समेत गरे ।

रत्नराज्य लक्ष्मी क्याम्पस स्वतन्त्र विद्यार्थी युनियनका सभापति राजकुमार राईले संवैधानिक परिषदले सिंहको सिफारिस नसच्याएसम्म विरोधका कार्यक्रमहरु जारी रहने बताए । त्यस्तै विश्वभाषा क्याम्पस अखिल क्रान्तिकारी (मोहन वैद्य समूह)का अध्यक्ष रोमश श्रेष्ठले कार्कीको नामको सिफारिस स्वीकृत भए अब विद्यार्थीले हिंसात्मक आन्दोलन गर्ने चेतावनी दिए । रायमाझी आयोगले दोषी समेत ठहर गरेको सिंह शाही शासनको समयमा मुख्य सचिव थिए ।

0 comments

Post a Comment