नेकपा–माओवादीसँग अरु दुई पार्टी मिसिँदै
काठमाडौ, पुस २४– नेकपा माओवादीका
महासचिव रामबहादुर थापा ‘बादल’ले तीन कम्युनिस्ट पार्टी एकीकरणको अन्तिम
चरणमा पुगेको बताएका छन् । “सँगै मिलेर
द्वन्द्व गरेका मणि र परी नेतृत्वको माओवादीसँग एकीकरण अन्तिम चरणमा पुगेको छ,”
उनले भने – “एमाओवादीका दोस्रो तहका नेताहरु समेत हामीसँगै एकीकरण
प्रयासमा छन्, नेतृत्वको कारण
हुन सकेको छैन ।”
पछिल्लो एक हप्तादेखि रोल्पा, प्यूठान, रुकुम र दाङमा
जिल्लास्तरका कार्यकर्तालाई प्रशिक्षण दिँदै आएका महासचिव बादलले बुधबार प्यूठानको
विजुवारमा एमाओवादीका महासचिव कृष्णबहादुर महरासँग पनि आफूले पार्टी एकीकरण र
वामपन्थी पार्टीको एकता केन्द्र स्थापना गर्ने विषयमा छलफल गरेको बताए ।
“एमाओवादी पनि संविधानसभामा पेलिएको छ,” उनले भने – “अब सबै एकै स्थानमा आउनुपर्ने समय आएको छ ।” पार्टी एकीकरणका विषयमा धेरै समय खर्चेका नेता
बादलले केही समय पहिला विभाजित भएको नेकपा माओवादीका अध्यक्ष नेत्रविक्रम चन्द ‘विप्लब’को अलग्गिने निर्णयलाई ‘आवेगको गल्ती’
संज्ञा दिएका छन् ।
संविधान निर्माणको एक फरक प्रसङ्गमा उनले माघ ८ मा संविधान
नबन्ने दाबीसमेत गरे । “राष्ट्रिय
सम्मेलनबाट मात्रै संविधान निर्माण हुन्छ,” उनले भने – “राष्ट्रिय
सम्मेलन गर्ने हो भने अझै पनि समय छ ।” जिल्लास्तरमा ३० जनाभन्दा धेरै कार्यकर्तालाई प्रशिक्षण दिँदै उनले
संविधानसभाले द्वन्द्वका मुद्दालाई सम्बोधन गर्न नसक्ने समेत बताउनु भएको
प्रशिक्षणमा सहभागी नेकपा माओवादीका जिल्लास्तरका एक नेताले जानकारी दिए ।
द्वन्द्वको समयमा सशक्त भूमिका खेलेका माओवादी नेताहरु
कृष्णबहादुर महरा, रामबहादुर थापा र
नेत्रविक्रम चन्द अहिले प्यूठान, रोल्पा र दाङमा
रहेका छन् । रासस
0 comments